ဖေဖော်ဝါရီ ၁၇၊ ၂၀၂၆
Sh V (VOM)
ကချင်ပြည်နယ်၊ ဖားကန့် ကုဋေမှော် အဲဗားမှာ ဖေဖော်ဝါရီ ၁၆ ရက်နေ့ည ၉ နာရီကျော်ခန့်က မြေစာပုံပြိုကျလို့ လူတချို့ ပါသွားကြောင်း ဒေသခံတွေဆီက သိရပါတယ်။
“မနေ့ည ကိုးနာရီခွဲခန့်က ကုဋေမှော်မှာ မြေစာပုံပြတ်ကျပြီး လူတော်တော်များများ မြေစာပြိုတဲ့နောက်ပါသွားပါတယ်။ အနည်းဆုံး လူ၂၀ခန့် သေဆုံးတယ်လို့သိရတယ်။” လို့ ကယ်ဆယ်ရေးနဲ့ နီးစပ်သူ တယောက်က ပြောပါတယ်။
မနေ့ ဖေဖော်ဝါရီ ၁၆ ရက်နေ့ည ၉ နာရီ ၁၅ မိနစ်၊ ၉ နာရီ ၂၀ မိနစ်လောက်မှာ မြေစာပုံ ပျက်ကျသွားတာလို့ သူက ပြောပါတယ်။
“ကုဋေမှော် ၁၁၁ ကုမ္ပဏီ ရေအိုင်ဘက် ပြေစာပုံ ပြိုကျလာတာမှာ ရေလျှံကျလာတာ။ ကုဋေမှော် ဘက်ခြမ်း မြေစာပုံပြိုကျတာဖြစ်ပြီး လူ ၁၀ ယောက်လောက်က ပြန်လွတ်လာတာရှိတယ်” လို့ မျက်မြင်ကိုယ်တွေ့ ဒေသခံက ဆိုပါတယ်။
ပြတ်ကျသွားတဲ့ မြေစာ ပမာဏများတဲ့အတွက် အောက်မှာပိနေတဲ့ လူတွေကို ပြန်တူးဖော်ဖို့ခက်ခဲပြီး စက်ယန္တယားပေါင်းများစွာနဲ့ အချိန်ပေး တူးဖော်မှရနိုင်မှာ ဖြစ်တယ်လို့ သူက ပြောပါတယ်။
ကူညီကယ်ဆယ်ရေးအတွက် လတ်တလော ထိထိရောက်ရောက်လုပ်ဆောင်နိုင်ခြင်းမရှိသေးဘူးလို့လည်း ဆိုပါတယ်။
ဖားကန့်မှာ နှစ်တိုင်းမြေစာပုံပိလို့ သေကြတာရှိပေမယ့် အနယ်နယ်အရပ်ကလာတဲ့ ရေမဆေးကျောက်ရှာသူတွေကို ဟန့်တားနိုင်ခြင်းမရှိသလို ကာကွယ်မှု ထိမ်းသိမ်းမှုမလုပ်နိုင်တာကြောင့် ပြိုကျတိုင်း လူတွေသေဆုံးနေရပါတယ်။
Video Crd# HkN
